Lost the Series – Блог за хит-серијата Изгубени

Уште во моментот кога дознав дека петнаесеттата епизода од последнава сезона ќе биде посветена на Џејкоб и Човекот во црно се сомневав дали тоа ќе биде епизода за паметење, или пак епизода која повеќето од нас ќе сакаат што побрзо да ја заборават. Дилемата за оваа епизода ми останува се’ уште. Не ни верувам дека некој од нас знае што точно ни понуди “Across the Sea”. Ако за нешто сум сигурен, тоа е дека ова е најконтроверзната епизода од Lost досега прикажана.

Изненадувачки за мене е односот на продуцентите кон пристапот на фановите за епизодава. Како никогаш досега, Демон Линделоф и Карлтон Кјус изгледаа сосема смирени и до некој степен, дури и не-изненадени од реакцијата на публиката. Дали можеби нивната поента беше да се истакне некое нивно размислување преку “Across the Sea”? Дали оваа епизода, кога Lost ќе заврши, ќе биде онаа за која ќе кажеме дека „сега сфаќаме што и беше поентата“?! Или пак, едноставно глумат „фраери“ бидејќи крајот е близу, па веќе и сеедно им е?…

Одговорот на ова прашање ќе ни пристигне за една недела и неколку денови. Дотогаш, можеме само да погодуваме…

Интересна информација
Многумина од Вас не знаат, но знам дека сакаат да знаат. Епизодава, според спојлер-изворите на DarkUFO кои имале можност да го прочитаат сценариото, завземала место во 24^та година од нашата ера. Тоа значи дека во моментот кога Џејкоб и неговиот брат биле родени, Исус се’ уште шетал на планетата Земја. Или не шетал. Прашање на лично верување, секако. Во секој случај, навикнетете се со паралелите со Библијата. Ќе ги има во голема мера подолу!

Светлината
Еден од подобрите мигови во “Across the Sea”, беше запознавањето со „светлината“. Не, не зборам за оној детски CGI ефект, за кој многумина се пожалија дека излегол од некој старовремски Дизни цртан, туку пред се’ мислам дека ова беше одличен потег гледајќи од сценаристичкиот аспект. Некои се жалат дека овој елемент во Изгубени ни е откриен предоцна, но јас го мислам токму спротивното. Ако го дознаевме ова 10 епизоди претходно, веќе ќе имавме одлична претстава за тоа што точно е Чудовиштето. Вака, на 2 епизоди до крајот, не е страшно, затоа што се’ уште има и останати мистерии за разрешување, во кои сме веќе „инвестирани“ како гледачи. (како на пример, „алтернативниот“ универзум)

Разочаран сум што на повеќето Lost блогови и сајтови, беше потрошено огромно време за дискутирање во врска со мајката, па овој момент дури и е засенет од неа. Јас не знам како е возможно фановите да не ја разберат простата поврзаност помеѓу светлото (изворот), „магарешкото“ тркало кое „паметните“ луѓе сфатиле дека ако го поврзат со извор на вода ќе го помрдне Островот и самата DHARMA Иницијатива, чија што, ВЕ ПОТСЕТУВАМ, главна работа на Островот и беше да ги истражи (и искористи притоа) електромагнетичките потенцијали на истиот.

Имајќи во обзир дека знаењата на „мајката“ 2000 години пред нас биле прилично лимитирани за да успее да го објасни како што треба „светлото кон кое сите луѓе се стремат“ (метафора за човековата душа), мислам дека секоја мистерија поврзана со потеклото на Чудовиштето е сега на некој начин одговорена, со тоа што точките самите ние треба да си ги поврземе. Имено, во тоа светло, била сместена пред се’ [електромагнетичката] енергија на Островот. Со оглед на тоа што оваа енергија е премногу голема за човекот да ја прими, а уште помалку разбере, истата МОРА да биде заштитена од заштитникот (protector-от) на Островот (во епизодава: мајката, а подоцна и Џејкоб). Зошто?! Не ме прашувајте зошто. Ако почнеме да си го поставуваме ова прашање, ништо во Lost нема да има смисла. И да, малце бев разочаран по епизодава кога сфатив дека навистина, на секое зошто, во Изгубени НЕМА ЗАТОА ШТО, ама тогаш пак ми текна на филозофската страна на оваа серија – за која ќе имате можност да прочитате повеќе подолу.

Како и да е, дојдовме до изворот – срцето на Островот. Како и се’ во изминативе две сезони, така и овој извор не можам а да не го поврзам со Библиското фамозно „забрането дрво“. Сличноста е огромна помеѓу дрвото чиишто плодови не смееја да ги пробаат (а ги пробаа поради итрината на злобната змија) Адам и Ева и ова светло (или срце на Островот, како сакате) за првпат појавено во епизодава. Сметам дека главната поврзаност, покрај забраната да се „чепнат“ и двете работи, е и казната за која мајката прозбори дека е дури и „полоша од смрт“. Адам и Ева можеби не умреа веднаш, но каснувајќи од плодовите, ја загубија безгрижноста, хармонијата и беа избркани од рајот.

Во Lost, Островот станува пеколно место за живеење, откако е чепнато неговото срце. Островот побарал само едно нешто од луѓето кои го населуваат – да не се чепка тоа место НИКАКО, па сега, откако такво нешто е сторено (како резултат на бесот на Џејкоб), Островот ги казнува луѓето со тоа што го ослободува злото засекогаш. Заклучок: Чудовиштето е метафора за првиот човеков грев и за човековата фатална љубопитност да се открие нешто кое никогаш не ни требало да биде откриено.

Зборувајќи за светлината…
Како што видовме, дел од истата е присутна и на некои места далеку под земјата на Островот. Од претходните две сезони, имавме можност да дознаеме дека она место под Орхидејата, за кое во епизодава видовме дека знаеле и луѓето кои живееле со Џејкоб и неговиот брат, користи дел од овој извор на енергија со кој располага Островот. Очигледно, за разлика од претходните случаи, научниците на DHARMA биле доволно мудри за да не ја чепкаат оваа енергија, но истовремено да ја искористат до некоја мера за свои цели. Класичен пример: го оставаат тркалото под Орхидејата онакво какво што си е, веројатно ЗНАЕЈЌИ дека ќе биде опасно ако сторат било што со истото, но затоа пак градат цела нова станица над него имајќи ги во обзир капацитетите на оваа огромна (електромагнетичка) енергија со која располага ова чудесно парче земја…

Мислам дека со ова е ставен крај и на мистериите (ако воопшто ги имаше) за окното, односно станицата „Лебед“, која се чини дека била централна во мисијата на Иницијативата. Кристално јасно е дека сета оваа електромагнетичка енергија е всушност „светлината“ за која мајката говореше во “Across the Sea”, која како што видовме има повеќе специфични места на кои се појавува – доказ за ова се „дупките“ од кои извира самото Чудовиште, а една ваква дупка ако добро се сеќавам видовме во финалето на првата сезона “Exodus”, потоа лани во “This Place is Death” (под Храмот) итн… Секако, имајте на ум дека главната концентрација на оваа електромагнетичка енергија се наоѓала на местото до кое мајката ги одведе малите Џејкоб и брат му… и истата, откако се случил инцидентот со Флок, била веројатно оштетена – та затоа во сегашноста се појавува ЕДИНСТВЕНО на одредени локации, кои биле претпоставувам поблизу до главниот извор така што не ја изгубиле целосната сила. (мислам дека ова има смисла, затоа што и „Лебедот“, но и „Орхидејата“ се наоѓаат длабоко во внатрешноста на Островот, а Светлината за која што зборувам, логично е да претпоставиме дека се наоѓала во средината/срцето на Островот!)

Сепак, ова и не е така важно. Важно е дека буквално сите чудесни работи на Островот се случуваат благодарение на оваа светлина (електромагнетизмот)… Почнувајќи од проектите на DHARMA, па до поместувањето на Островот.

Доброто против злото
Резултатот останува изедначен, со по еден автогол и на двете страни. Победник? Продуцентите на Lost. Им симнувам капа! Едноставно, им симнувам капа! Иако го пишував ова во текот на целава сезона, најпосле се оствари мојата замисла. Дефинитивно никој не е претставник ниту на доброто, ниту пак на лошото во оваа серија. Сите имаат по нешто и од двете.

Толку и од божјата смиреност и трпение на Џејкоб. Уште во “Ab Aeterno” видовме дека овој човек, не толку одамна, не бил толку самоуверен и верен на Островските услуги (кога буквално му ги извади цревата на Рикардос в лутина и бес), за да сега дознаеме дека истиот тој Џејкоб е кривецот за појавувањето на темнината која го опкружува Островот: Чудовиштето. Кога сме веќе на тема Џејкоб, интересно е како тој не доби шанса за да одлучи самостојно дали ја сака улогата на протектор на Островот или не. Едноставно, како што и мајката кажа, тој МОРА да го прави тоа и нема тука што да се противи. Иако навистина типот не се противи, подоцна гледаме како оваа идеологија на мајката, Џејкоб целосно ја отфрла (веројатно во знак на своевиден протест?), та на сите свои кандидати им дава шанса сами да одлучат во какви луѓе ќе се претворат, и дали ќе сакаат да го наследат неговото место!

Во меѓувреме, останува отворено големото прашање – дали Човекот во црно, оној кој го гледавме во изминативе две сезони, е братот на Џејкоб и е „човековата“ (ако може така да се нарече) страна на Чудовиштето? Мислам дека одговорот на ова прашање е потврден. Од повеќе причини:
1) Мајката, по не знам кој пат кажувам, спомна оти оној човек кој ќе ја почувствува енергијата со која располага Островот, ќе доживее казна полоша и од смрт. Која казна е полоша од смрт, ако не онаа која тотално ви ја разорува душа – оцрнувајќи ја до тој степен што повеќе не гледате никаква радост и желба за живот…? И притоа, ве прави бесмртен?! Ако мене ме прашате – ова е случајот со братот на Џејкоб. Тој е фиктивно жив, но во суштина мртов… заробен од темнината. Слично како што е случајот со Клер, и претходно Саид… И да, ете уште еден одговор на не толку важна мистерија. Дефинитивно е потребно некој да умре за да биде завладеан од страна на темнината. И телото на братот на Џејкоб лежеше мртво, што значи дека ова е предуслов број еден за да се стане „лош“…
2) Од некоја причина, и 1800 години по смртта на (безимениот) брат на Џејкоб, Чудовиштето се’ уште го користи неговото тело при разговорите со Џејкоб и Ричард (како што видовме во “The Incident” и “Ab Aeterno”). Бидејќи одбивам да помислам на можноста да се работи за обична непретпазливост на сценаристите, одам со погорната теорија – дека душата на Флок е заробена во Чудовиштето.
3) Последната и најважна причина е самиот исказ на Флок во една од изминатите епизоди од сезонава (за жал не ми текнува која беше точно, но мислам дека беше “Recon”) кога на Соер му кажа дека едно време „и тој бил човек како и сите други“… Не ме држете за збор за епизодата и ликот на кој му го кажа ова, но тврдам дека ваков исказ се случи сезонава!

Мајката = Чудовиштето?
Моментот кој најмногу ме буни и ЌЕ ме буни најверојатно и по крајот на Изгубени, е оној кога Флок ќе биде онесвестен од својата „мајка“, откако таа ќе дознае за намерите на неговите пријатели кои се на добар пат да ја искористат во свои цели енергијата на Островот.

Откако братот на Џејкоб ќе се разбуди, целата негова „дружина“ е мртва, а местото на кое што се наоѓаше се’ уште недоизградениот систем за поместување на Островот е затрупан под земја. Логичното прашање кое се поставува тука е… како по ѓаволите е возможно мајката да го стори сето ова во рок од неколку минути, па еве и часови?

Дали нејзиниот збор (колба) е доволна за да се случи таков раскол помеѓу луѓето, или пак таа има посебни моќи (слични на оние на Чудовиштето) со кои го сторила сето ова?! Тука навистина сум оставен во дилема и без зборови… затоа што, од една страна, нормално е да си помислиме на оваа можност, но пак од друга и не е – бидејќи како што видовме, дури неколку моменти по смртта на мајката беше создадено Чудовиштето!

Сепак, братот на Џејкоб мисли дека таа го сторила злоделото?! Што ли е работата тука, по ѓаволите?!? Помислив и на можноста чуварот на Островот да има моќ да се претвори во Чудовиште или нешто слично, ама тоа нема смисла, бидејќи лани во финалето на петтата сезона Џејкоб видовме дека ништо не стори дури и кога и на самиот него му беше јасно дека ќе умре…

Заклучокот овде е дека нема заклучок. Се надевам дека ќе дознаеме повеќе во последните две епизоди!

Хронологија на цивилизациите во LOST
И сега, откако ја изгледавме епизодата која не однесе во најдлабокото минато на Островот, мислам дека можеме да ја поставиме конечната хронологија на цивилизации кои го населувале ова место.

НЕОДРЕДЕНО ВРЕМЕ ВО МИНАТОТО – некоја цивилизација одамна пред Римјаните, го населува за првпат Островот и си поставува за цел да го заштитува истиот. Се менуваат повеќе протектори.
ЦИВИЛИЗАЦИЈАТА НА „МАЈКАТА“ – се прашувате зошто не е од првичната цивилизација? Бидејќи, и самата спомна дека пристигнала на ист начин на Островот како и Клаудија (вистинската мајка на Џејкоб): како резултат на несреќа! По некое време, таа станува заштитник и ја има истата улога како и претходните генерации: да го заштити изворот по секоја цена.
0024 година од нашата ера – Римјаните пристигаат на Островот. „Мајката“ ги пронаоѓа своите перфектни наследници откако Клаудија, бремена жена, раѓа две машки деца. „Мајката“ се одлучува да ја убие вистинската мајка за да ги заштити децата од понатамошни „лоши“ влијанија.
0037 година – Џејкоб и братот играат на плажата. Братот ја дознава вистината за мајката. Братот им се придружува на Римјаните.
околу 0050 година – Мајката му дава од чудесното вино на Џејкоб и со тоа тој станува заштитник на Островот. Мајката е убиена од страна на братот; а братот доживува судбина полоша и од смрт – претворајќи се во Чудовиште. Сега, главната мисија на Џејкоб е да го задржи ова зло над сите зла на Островот, бидејќи во спротивен случај – тоа е крајот на светот!
I – III век – на Островот се населуваат Еѓипќани. Во чест на Џејкоб ја градат статуата на Таверет (се прашувам… дали сега истата е метафора за „мајкава“?!), а во чест на Чудовиштето ги градат тајните одаи под Храмот (како негов дом, во кој сместуваат и добар дел од својата култура.. се сеќавате на Анубис, богот на војната, од кој извира Чудовиштето?!) и секако самиот Храм, заедно со останатите подземни тунели на Островот.

IV – XVIII век – се менуваат поголем број на цивилизации. “They come, they fight, they destroy, they corrupt. It always ends the same.”
XIX век – Црната Карпа пристига на Островот. Ричард е поставен за „заменик“ на Џејкоб. Започнува создавањето на „Другите“ како најнова Островска цивилизација.
XX век (1950тите) – Американската војска дознава за Островот и се обидува да го искористи. Поради постојаното менување на локацијата на истиот, тие се откажуваат од првобитниот план.
1970 – 1992 – DHARMA Иницијативата пристига на Островот. Се случуваат многу недоразбирања со „домородното“ население на Ричард, а по Инцидентот работите уште повеќе се влошуваат. Најпосле, Бен, по инструкција на Џејкоб им става крај на маките на научниците, откако истите, слично како и поранешната дружина на Човекот во црно, ќе започнат да навлегуваат се’ подлабоко и подлабоко во Островските тајни.
2004 – падот на летот 815. Смртта на Џејкоб. Прва посериозна шанса Чудовиштето да завладее со светот. Кој ќе победи? Никој не знае се’ уште!

Харли и Џек = Човекот во црно и Џејкоб?
Неколку симптоматични навестувања имавме во “Across the Sea” дека е можно Харли да го наследи Човекот во црно, а Џек, Џејкоб. Харли може да гледа мртви луѓе, на сличен начин како што можеше и братот на Џејкоб. Џек, од друга страна, барем сега е многу сличен на Џејкоб од минатото. Навидум смирен и верен на Островот, а внатре во себе – врие од растревоженост и несигурност.

Ако за Џек одамна се навестуваше вакво нешто, за Харли сум малце изненаден. Се надевам дека нема да го претворат сценаристите него во некаков вид на зомби. И не ни верувам. Но, интересна е сличноста, мора да се признае!

Одговор за алтернативниот универзум?
Во деталното објаснување на мајката за моќта на изворот на Островот, таа се изјасни дека истата е окарактеризирана како „живот, смрт и повторно раѓање“. Смртта претпоставувам дека е искажана преку самото постоење на Чудовиштето. За животот, не сум сигурен, но мислам дека се мисли на цивилизациите кои под дејство на оваа сила пристигнуваат и притоа го населуваат Островот. Е, сега, „повторново раѓање“ (или на англиски: rebirth) имам чудно чувство дека е поврзано и со патувањето низ времето овозможено со дел од оваа сила откако ќе се сврти тркалото под Орхидејата, но и со алтернативниот универзум кој го следиме баш во истава сезона и кој во минатите теории реков дека е најверојатно создаден по детонирањето на Jughead во окното (каде што веќе знаеме дека беше стационирана дел од енергијата на Островот, што значи дека лесно истата енергија би се ослободила во случај да се случи детонација на бомба!).

Можно ли е токму тоа да е одговорот – дека Островот им дал втора шанса на преживеаните во животот? И дали затоа Дезмонд беше фрлен од страна на Флок во еден од овие бунари, како еден вид на хинт од страна на сценаристите?!? Останува да видиме…

Across the Sea – дефиниција за животот?
Спомнав уште во почетокот на овој пост дека оваа епизода крие во себе една филозофска страна. Со многу фанови го имав дискутирано ова во текот на минативе два-три дена, и никој од нив не се противеше на оваа идеја.

Што ако… се’ што видовме во последната епизода, едноставно беше одличен приказ на нашиот земен живот? Буквално се! Почнувајќи од раѓањето на Џејкоб и неговиот брат (очигледно… секој живот почнува со ова, зар не!), до нивниот постепен развој, првото соочување со стравот (опасноста од други луѓе во џунглата), соочувањето со цивилизацијата, па запознавањето со карактерите на останатите луѓе, запознавањето со човековата душа, односно нештото кое сите ние се стремиме да го имаме (изворот на Островот, кое нели, е олицетворение на претходно-споменатата душа), па алчноста на луѓето за да се здобијат со нешто кое ниту самите не го разбираат (навлегувањето во најтемните тајни на Островот, претставено претходно и преку DHARMA Иницијативата) и се така до главниот цитат кој ја одбележува оваа епизода, дека…

СЕКОЕ ОДГОВОРЕНО ПРАШАЊЕ САМО ЌЕ НЕ ДОВЕДЕ ДО НОВИ ПРАШАЊА.

Што ако, сето ова погоре, е едно лично видување на сценаристите за суштината на животот? За тоа колку ние, како луѓе, малку знаеме за се’ она што не опкружува? Дека сме сите ние марионети на оние поголемите од нас (мајката > Џејкоб) и дека сме далеку од она што се замислуваме дека сме (видувањето на мајката и Човекот во црно за човековата цивилизација)?

Можеби, токму затоа и епизодава беше направена на ваков начин? За еден ден конечно да ја разбереме нејзината тежина и идеја?! Којзнае… што и да е случајот, им давам рака на Дарлтон. Потребна е храброст да се напише ваква епизода. Не само затоа што уништува голем дел од теориите на фановите (а тоа знае да биде тешко за прифаќање понекогаш), туку и затоа што те тера навистина да размислиш за вистинската порака која ни се праќа.

They come. They fight. They destroy. They corrupt. It always ends the same.

Одјава
Колку имав – толку па и немам проблем со епизодава. Сценаристите најдоа одличен начин за да и стават крај на досадната мистерија со Адам и Ева (скелетите од првата сезона), разврска која ни малку не ја очекував, а и покрај тоа што потрошија значителен дел од епизодава со Џејкоб и братот како децата, сепак, на крајот се чини дека се исплатеше да ја видиме сета оваа страна од нивниот одамнешен карактер. Откривме дека биле сосема обични луѓе, но дека и како сите останати кои дошле на Островот, се промениле за 360 степени… кој заради свои заслуги, кој заради туѓи. Across the Sea понуди одлична дебата помеѓу фановите и за тоа никогаш нема да биде заборавена. Згора на се’, присутни беа главните елементи на оваа серија: борбата помеѓу доброто и злото и судбината (вербата во Островот) и науката…

Колку повеќе размислувам за епизодава – толку е подобра!!!

До наредната недела, Ве поздравувам и ги очекувам Вашите коментари!

UPDATE 23:30
Не ми се верува дека заборавив да напишам теорија за тоа дека Џон Лок во “Walkabout” за првпат ни навести за оваа „светлинава“ која ја видовме најпосле дури сега! За ова дефинитивно ќе посветам теорија в наредната недела… ете, тоа е, од премногу пишување заборавив се’ што сакав да кажам!

~ by lostseries on мај 14, 2010. Tagged: 6x15, Lost, теории, шеста сезона