Lost the Series – Блог за хит-серијата Изгубени

Речиси три месеци по крајот на Изгубени, ТВ индустријата се’ уште нема заборавено за трагата која оваа серија ја остави во своите шест сезони. Разноразни вести за Lost се шират на сите светски филмски портали, а фановите како за инает да и противречат на финалната порака на шоуто која гласеше: откажетете се’.

Сепак, ниту тоа не е доволна причина за актерите да земат заслужен одмор. Па, впрочем, кој и одмара во Холивуд?!

Започнуваме од најважните па до најспоредните:
- Метју Фокс (Џек): веќе има договор за снимање на два нови филмови, од кои за едниот (Billy Smoke) на големо се зборува уште од сега. Вториот филм е “Mass Effect” и засега ништо не знаеме повеќе од самиот наслов.
- Еванџелин Лили (Кејт): во моментов го снима филмот “Real Steel” во кој ќе ја игра главната улога заедно со Хју Џекмен. Интересно е што во истиов филм настапува и Кевин Дуранд (Мартин Кими, главниот негативец од четвртата сезона на Изгубени).
- Даниел Дае Ким (Џин): на него по се изгледа му беше најлесно да си најде нов проект после Lost. Веднаш по завршувањето на Изгубени, тој се зафати со снимањето на уште една нова серија која исто така се снима на Хаваи – “Hawaii Five-O“, во продукција на CBS.
- Емили де Равин (Клер): е дел од екипата за анимираниот филм “Legend of the Guardians: The Owls of Ga’Hoole“. Не се мачете да го запомните името, ќе бидете благовремено известени кога ќе излезе низ кино-салите.
- Доминик Монањан (Чарли):  ниту неуспешната сезона со FlashForward, не беше причина за Дом да се откаже од новите предизвици. Тој ќе глуми во акцијата “Soldiers of Fortune” која се очекува да излезе в почетокот на идната година.
- Џереми Дејвис (Фарадеј): тој е еден од споредните актери во драмедијата “It’s Kind of a Funny Story” која ќе излезе во САД при крајот на септември.
- Елизабет Мишел (Џулиет): ѕвездата од новата sci-fi серија на ABC, “V” (чија втора сезона со нетрпение ја очекуваме в зиме), никако да најде одмор за себе. Неа ќе ја видиме наскоро во филмот “Answers to Nothing“.
- Иан Сомерхалдер (Бун): ја продолжува својата ТВ кариера со втората сезона од тинејџерската атракција “The Vampire Diaries“, каде ја игра улогата на негативецот Демон.
- И последно, но не и неважно… сигурно досега на ваков или онаков начин имавте можност да чуете за најновиот филм на Роберт Де Ниро (и Џесика Алба… и Стивен Сигал… и Линдзи Лохан!) “Machete“. Верувале или не, во овој филм, покрај претходно споменатите ѕвезди, ќе имаме можност да видиме дури три лица од Lost: Џеф Фејхи (односно, Френк Лапидус), Мишел Родригез (т.е., Ана Лусија) и Чич Марин (познат и како таткото на Харли, Давид Рејес). Знам дека уште отсега сте нестрпливи за да го изгледате филмов, но ќе мора да причекате до 3 септември!

Тоа е тоа засега. Им посакуваме многу среќа на Изгубените кои веќе си најдоа нов проект и уште повеќе на оние кои допрва ќе треба тоа да го сторат!

Како за крај – за кој од овие филмови/серии најмногу сте возбудени и зошто?? Дали можеби знаете за некој нов проект на актер од LOST кој е несакајќи пропуштен в постот?! Или пак имате некаква можеби рандом препорака за добар филм?! Што и да Ви падне на памет, добредојден ќе биде Вашиот коментар!

Поздрав и… NAMASTE.

~ by lostseries on август 15, 2010. Tagged: Lost, the end, актери, филм